बंगलादेशमा ९० वर्षीय नेतालाई ९० वर्ष कैद सजाय गरेको छ

३१ असार, काठमाडौं । बंगलादेशकेा एक युद्ध अपराध अदालतले जमात-ए-इस्लामीका नेता गुलाम आजमलाई दोषी ठहर गरेको छ । पाकिस्तानबाट स्वतन्त्रताका लागि सन् १९७१ मा लडिएको युद्धका क्रममा हजारौं मानिसको हत्या र बलात्कारमा संलग्न भएको आरोपमा ९० वर्षीय नेता आजमलाई ९० वर्षको कैद सजाय सुनाएको हो ।

आजमले भने आरोप अस्वीकार गर्दै आएका छन् । उनका समर्थकले यसलाई राजनीतिबाट प्रेरित भनेका छन् । सोमबार अदालतको फैसला आउनु पूर्व प्रहरी र जमात-ए-इस्लामीका कार्यकर्ताबीच झडप भएको थियो । राजधानीमा ढाका र देशका अन्य शहरमा भएको झडपमा सयौं घाइते भएको बीबीसीले जनाएको छ । प्रदर्शन गरिरहेका जमात-ए-इस्लामीका कार्यकर्ताहरुलाई तितर-बितर पार्न प्रहरीले रबरको गोली चलाएको थियो ।

युद्ध अपराधको मामिलामा यो अदालतले सुनाएको यो पाँचौं फैसला हो । २०१० मा वर्तमान अवामी लीग सरकारले अन्तराष्ट्रिय अपराध न्यायाधीकरणको गठन भएको थियो । यसको उद्देश्य १९७१ को स्वतन्त्रता संग्रामका क्रममा पाकिस्तानी सेनालाई कथित रुपमा सहयोग गर्नेहरुलाई सजाय दिनेछ । मानवअधिकारवादी संगठनहरुले भने यो न्यायाधीकरण अन्तराष्ट्रिय मान्यताको पालना नगरेको बताउँदै आएका छन् ।